भदौ ३१ काठमाडौं / रामेछापमा सवारी जीप दुर्घटना भएको छ । बिहिबार बिहान ६ बजेतिर मन्थली नगरपालिका-६ हात्तीटार नजिकै जीप दुर्घटना हुँदा ३ जनाको मृत्यु भएको छ भने एक जना बालक घाइते भएका छन ।
काठमाडौंबाट ओखलढुंगातर्फ जाँदै गरेको प्रदेश ३-०१-०२३ च ३५१३ नम्बरको बोलेरो जीप दुर्घटना खुर्कोट-मन्थली सडकखण्डको हात्तीटार भीरबाट करिब तीन सय मिटर तल तामाकोशी नदीमा खसेर दुर्घटना भएको जिल्ला प्रहरी कार्यालय रामेछापले जनाएको छ ।
दुर्घटनामा परी तीन जनाको घटनास्थलमै मृत्यु भएको हो । मृत्यु हुनेमा ओखलढुंगा श्रीतेम्बा गाउँपालिका-६ फिदी फलाँटेका अन्दाजी ३४ वर्षीय लाक्पा शेर्पा, उनकी श्रीमती अन्दाजी ३१ वर्षीया फुर्वा शेर्पा र गाडी धनी अन्दाजी ३५ वर्षीय वाङछे शेर्पा रहेका छन ।
दुर्घटनामा घाइते भएको लाक्पाका १२ वर्षीय छोरा धावा शेर्पालाई थप उपचारका लागि काठमाडौं लगिएको छ । तीव्र गतिमा रहेको जीप साँघुरो सडकको घुम्तीमा अनियन्त्रित भएर दुर्घटना भएको प्रहरीको भनाइ छ । दुर्घटनाका सम्बन्धमा थप अनुसन्धान भइरहेको प्रहरीको भनाइ छ ।
